Ikipe ya Rayon sports WFC ihagarariye u Rwanda mu mikino ya CAF Women’s Champions League CECAFA yageze kuri finali ihabwa agahimbaza musyi karenga miliyoni 8 n’Amagaziye ya Skol.
Kuri iki cyumweru niho Rayon sports y’Abari n’Abatega Rugori yagarutse mu kibuga ikina na Kampala Queens maze iminota 90 y’Umukino irangira ari ubusa ku busa ndetse n’iminota 30 yongeweho irangira ntakipe ibashije kunyeganyeza incundura ngo ibone igitego.
Kunganya ubusa k’ubusa byaje gutuma amakipe yombi ajya muri penalite maze ikipe ya Rayon sports WFC itsinda Kampala Queens Penalite 4-3, maze ikipe ya Rayon sports WFC ica agahigo nk’ikipe yambere mu Rwanda igeze ku mukino wanyuma wa CAF Women’s Champions League CECAFA.
Mbere y’uko Rayon sports WFC ijya gukina uyu mukino Perezida w’Umuryango wa Rayon sports Bwana Twagirayezu Thadé yari yabanje guha ubutumwa aba bakinnyi ndetse anababwira ko ubuyobozi bwicaye bukabagenera agahimbaza musyi ka miliyoni 3 nk’igihembo cy’uko bageze ku mukino wa kimwe cya kabiri.
Perezida wa Rayon sports kandi yari yabwiye aba bakobwa ko nibagera ku mukino wa nyuma azajya kubashyigikira kandi ko atazagenda wenyine ahubwo ngo azajyana n’itsinda rigari.
Ubwo Rayon sports WFC yahagurukaga mu Rwanda yerekeza muri Kenya gukina iyi mikino, Bwana Hardi Mukandama ushinzwe guhuza ibikorwa bya Skol na Rayon sports yavuze ko mu gihe Rayon sports WFC yabasha gutsinda umukino ikabona amanota atatu ko buri mukinnyi azahabwa amagaziye 15 ya Skol.
Na none kandi Umuyobozi wa FERWAFA D.r Shema Fabrice nawe yatangaje ko yahaye Rayon sports WFC agahimbaza musyi ka miliyoni 5 Frw, ibi bivuze ko mu mafaranga azwi amaze gutangwa ari miliyoni 8 n’Amagaziye akabakaba muri 375 kuko buri mukinnyi yemerewe amagaziye 15.
Ubuyobozi bwa Rayon sports ntibwari bwatangaza akandi gahimbaza musyi bwageneye Rayon sports y’Abagore yageze ku mukino wanyuma wa CAF Women’s Champions League Qualifiers 2025.
Ku mukino wa nyuma Rayon sports y’Abagore izahura na JKT yo muri Tanzania, bikaba biteganyijwe ko Finali izakinwa kuri uyu wa kabiri tariki ya 16 Nzeri 2025.
